Bu gün Azərbaycanda Prokurorluq İşçilərinin Peşə Bayramıdır

Oktyabrın 1-i Azərbaycanda prokurorluq orqanlarının əməkdaşları öz peşə bayramlarını qeyd edirlər. Bu gün milli prokurorluq orqanlarının yaradılmasının 108-ci ili tamam olur.

hadiseler.info xəbər verir ki, Azərbaycan Xalq Cümhuriyyəti Nazirlər Şurasının 1 oktyabr 1918-ci il tarixli qərarı ilə Bakı Dairə Məhkəməsinin tərkibində ilk dəfə prokurorluq təsis edilib.

Prokurorluq orqanlarının müasir dövlətçilik sistemindəki yeri və statusu isə Ümummilli Lider Heydər Əliyevin müəllifi olduğu 1995-ci il Konstitusiyası ilə təsbit olunub. Ulu öndərin 17 iyul 1998-ci il tarixli Sərəncamına əsasən, oktyabrın 1-i Prokurorluq İşçilərinin Peşə Bayramı Günü kimi təsis edilib.

Bundan başqa, Prezident İlham Əliyevin 3 mart 2004-cü il tarixli Sərəncamı ilə Baş Prokuror yanında Korrupsiyaya qarşı Mübarizə İdarəsinin yaratması bu sahədə islahatların genişlənməsinə, şəffaflığın və korrupsiyaya qarşı mübarizənin effektivliyinin artırılmasına mühüm töhfə verib.