Çexiyalı qapıçı 20 il müddətinə futboldan uzaqlaşdırıldı

Çexiyalı qapıçı Marek Kalina danışılmış oyunlarda iştirak etdiyinə görə 20 il müddətinə futboldan kənarlaşdırılıb.

hadiseler.info xəbər verir ki, bu barədə Çexiya Futbol Assosiasiyasının mətbuat xidməti rəsmi məlumat yayıb.

29 yaşlı qapıçı danışılmış oyunların təşkilində və korrupsiya əməllərində iştirakına görə assosiasiyanın keçirdiyi bütün tədbir və yarışlardan uzaqlaşdırılıb. Həmçinin futbolçuya 500 000 kron (təxminən 20 500 avro) məbləğində pul cəriməsi tətbiq edilib.

Aparılan araşdırmalar nəticəsində Kalinanın beş il ərzində baş verən 11 müxtəlif epizod üzrə təqsirli olduğu sübuta yetirilib.

Qeyd edək ki, Marek Kalinanın çıxış etdiyi son klub Çexiya çempionatının dördüncü divizionunda mübarizə aparan “Znojmo” olub.