Eldəniz Əzizli: “Himn səslənəndə bütün karyeram gözlərimin önündən keçdi”

Qazaxıstanın paytaxtı Astanada beşinci dəfə dünya çempionu olan Azərbaycanın yunan-Roma güləşçisi Eldəniz Əzizli qələbə təəssüratlarını bölüşüb.

hadiseler.info xəbər verir ki, titullu idmançımız yarışdan sonra jurnalistlərə açıqlamasında uzunmüddətli zəhmətindən və keçirdiyi duyğulardan danışıb. Ötən il qazandığı bürünc medalı özü üçün qənaətbəxş saymadığını vurğulayan 35 yaşlı güləşçi bu uğura nail olmaq üçün bir il ərzində gecə-gündüz çalışdığını qeyd edib:

“Beş dəfə dünya çempionu olmaq dildə asandır. Artıq 27-28 ildir ki, güləş karyeramı davam etdirirəm. Hamıdan çox mən istəyirdim ki, bu il dünya çempionu olum… Allah istədiyimizi bizə nəsib etdi və 35 yaşımda beşinci dəfə dünya çempionu oldum”.
Eldəniz Əzizli yarımfinal və final görüşlərinin turnirdəki ən çətin qarşılaşmaları olduğunu, rəqiblərin döyüş üslubunun əvvəlcədən təhlil edilərək taktiki plan əsasında mübarizə apardığını bildirib. Mükafatlandırma mərasimində Azərbaycan Dövlət Himni səslənərkən yaşadığı hissləri xüsusi vurğulayan çempion rayondan gəlməsini, Bakıdakı çətin məşqlərini, məğlubiyyətlərini və nəhayət, zirvəyə yüksəlməsini xatırladaraq həmin an bütün karyerasının gözləri önündən keçdiyini etiraf edib.

Gələcək karyerası ilə bağlı suala cavab verən idmançı şəxsi məşqçisi və federasiya rəhbərliyi ilə məsləhətləşdikdən sonra yaxın vaxtlarda qərarını açıqlayacağını bildirib. Xatırladaq ki, E.Əzizli Astanadakı finalda 55 kiloqram çəki dərəcəsində iranlı Pəyam Əhmədiyə 3:1 hesabı ilə qalib gələrək qızıl medala sahib çıxmışdı.