FIFA “Fənərbağça”ya transfer qadağası tətbiq edib

Türkiyənin “Fənərbağça” klubu FIFA tərəfindən dərc olunan transfer qadağası siyahısına salınıb.

hadiseler.info “Haber Global”a istinadən xəbər verir ki, ali futbol qurumunun qeydlərində İstanbul təmsilçisi üçün 3 transfer pəncərəsi müddətinə məhdudiyyət qoyulduğu göstərilib.

Sanksiyanın maliyyə öhdəlikləri ilə bağlı olduğu bildirilir. FIFA-nın sistemindəki məlumatlara əsasən, bu qadağa müvəqqəti xarakter daşıyır və tələb olunan məbləğ ödənildiyi halda dərhal ləğv edilə bilər.

Qadağanın tam olaraq hansı borc məsələsindən qaynaqlandığı və tələb olunan məbləğin miqdarı barədə hələlik ətraflı məlumat yoxdur. “Fənərbağça” klubu tərəfindən məsələ ilə bağlı rəsmi açıqlama verilməyib.