Finlandiya prezidenti: “Bəzi məlumatları ruslara çatdırmağa hazıram”

Finlandiya Prezidenti Aleksandr Stubb Ukraynadakı münaqişənin nizamlanması üzrə danışıqlarda ehtiyac yaranacağı təqdirdə vasitəçi kimi çıxış etməyə hazır olduğunu bəyan edib.

hadiseler.info xəbər verir ki, bu barədə “Yevropeyskaya pravda” nəşrinə verdiyi müsahibəsində bildirən dövlət başçısı danışıqlarda açıq iştirakçı olmağa can atmadığını, lakin təklif gələcəyi təqdirdə prosesə qoşulacağını qeyd edib.

Stubb öz vəzifəsinin daha çox pərdəarxası diplomatik dəstək vermək olduğunu vurğulayıb: “Mənim vəzifəm informasiyanı Ukraynadan ABŞ-yə, ABŞ-dən isə Ukraynaya ötürməkdir. Əgər ehtiyac olarsa, ruslara da müəyyən məlumatları çatdırmağa məmnuniyyətlə hazıram”.

Finlandiya lideri danışıqlarda əsas rolu amerikalıların oynadığını qeyd etməklə yanaşı, Avropa olmadan region üçün qərar verməyin mümkün olmadığını və bu prosesə daha çox tərəfin cəlb edilməsi istiqamətində iş aparıldığını bildirib.