Fransada kütləvi iğtişaşlar: Universitetlərin 90 faizində dərslər dayandırıldı

Fransada sentyabrın sonundan bəri davam edən tələbə və şagird etirazları ölkə miqyasında təhsil sistemini iflic vəziyyətinə salıb.

hadiseler.info xəbər verir ki, Fransanın təhsil naziri Eduard Jeffre “France Inter” radiosunun efirində nümayiş marşrutlarına yaxın yerləşən 200-ə yaxın liseyin təhlükəsizlik və ehtimal olunan ziyanın qarşısını almaq məqsədilə fəaliyyətini dayandırdığını bildirib.

Eyni zamanda, aksiyaların təşkilatçısı olan “Tələbə İttifaqı” həmkarlar ittifaqının məlumatına görə, ölkə üzrə 70-ə yaxın universitetin ən azı 90%-də tədris prosesi tamamilə dayandırılıb. Oktyabrın 13-də Paris başda olmaqla bir çox şəhərlərdə yeni nümayiş dalğası başlayıb.

Qeyd edək ki, yuxarı sinif şagirdləri və tələbələr həddindən artıq yüklənmiş dərs proqramına, müəllim çatışmazlığına və təhsil islahatlarına etiraz edirlər. Bəzi bölgələrdə iğtişaşlara çevrilən aksiyalar zamanı yüzlərlə şəxs yaralanıb, polislə toqquşmalarda 7 minə yaxın insan (onların 90%-i yetkinlik yaşına çatmayanlardır) saxlanılıb.