Hərbçilərin maaşları artırılır

Azərbaycanda hərbi qulluqçuların əməkhaqları artırılır və pul təminatının hesablanması qaydasında mühüm dəyişikliklər edilir.

hadiseler.info xəbər verir ki, bu məsələ Milli Məclisin oktyabrın 16-da keçirilən iclasında müzakirəyə çıxarılan “Hərbi qulluqçuların statusu haqqında” qanuna təklif edilən dəyişiklikdə öz əksini tapıb.

Yeni islahatlar paketinə əsasən, Müdafiə Nazirliyinin bütün hərbçilərinin əməkhaqları vergilər və digər icbari ödənişlər çıxıldıqdan sonra orta hesabla 22,8 faiz artacaq. Baza maaşı sayılan vəzifə maaşı rütbə maaşı ilə əvəz olunacaq və rütbə maaşının həcmi 70 faizə çatdırılacaq.

Layihəyə əsasən, Müdafiə Nazirliyinin hərbçilərinin pul təminatı rütbə maaşından, rütbə maaşından hesablanan əlavələrdən və mütləq rəqəmlərlə müəyyən edilən əlavələrdən ibarət olacaq. Bununla yanaşı, hərbi qulluqçuların və onların ailə üzvlərinin yeni xidmət yerinə köçməsi ilə bağlı xərclər, eləcə də qida məhsullarının verilməsi qaydaları dövlət büdcəsi hesabına müvafiq icra hakimiyyəti organı tərəfindən tənzimlənəcək.

Qanun layihəsi parlamentdə səsverməyə çıxarılaraq üçüncü oxunuşda qəbul edilib.