İlham Əliyev Esvatini Kralı III Msvatiniyə təbrik məktubu ünvanlayıb

Azərbaycan Respublikasının Prezidenti İlham Əliyev Esvatini Krallığının Kralı Əlahəzrət III Msvatiniyə Müstəqillik Günü münasibətilə təbrik məktubu göndərib.

hadiseler.info xəbər verir ki, dövlət başçısı məktubunda Esvatini Krallığının milli bayramı münasibətilə Kralı və onun simasında bütün Esvatini xalqını öz adından və Azərbaycan xalqı adından səmimi qəlbdən təbrik edib.

hadiseler.info President.az-a istinadən həmin məktubun mətnini təqdim edir:

“Əlahəzrət,

Esvatini Krallığının milli bayramı – Müstəqillik Günü münasibətilə Sizi və Sizin simanızda bütün xalqınızı öz adımdan və Azərbaycan xalqı adından ürəkdən təbrik edirəm.

Hazırda Azərbaycan ilə Esvatini arasında münasibətlərin inkişaf etdirilməsi üçün yaxşı şərait formalaşmışdır. Cari ilin may ayında WUF13-də iştirak etmək üçün Bakıya səfəriniz Azərbaycan-Esvatini əlaqələrinin tarixində xüsusi yer tutur. Mən Sizinlə səmimiyyət şəraitində keçən görüşümüzü və apardığımız fikir mübadiləsini ən xoş təəssüratlarla xatırlayıram.

İnanıram ki, xalqlarımızın mənafelərinə uyğun olaraq ölkələrimiz arasında dostluq münasibətlərini möhkəmləndirmək, əməkdaşlığımızın potensialından tam bəhrələnmək üçün bundan sonra da birgə səylər göstərəcəyik.

Bu bayram günündə Sizə möhkəm cansağlığı, xoşbəxtlik, işlərinizdə uğurlar, dost xalqınıza əmin-amanlıq və rifah diləyirəm”.