İlham Əliyev İsrail Prezidenti ilə görüşdü

Azərbaycan Respublikasının Prezidenti İlham Əliyevin oktyabrın 14-də İsrail Dövlətinin Prezidenti İsxak Hersoq ilə görüşü olub.

hadiseler.info AZƏRTAC-a istinadən xəbər verir ki, görüş zamanı İsrail Prezidenti Azərbaycanı Asiyada Qarşılıqlı Fəaliyyət və Etimad Tədbirləri üzrə Müşavirəyə (AQEM) uğurlu sədrliyi münasibətilə təbrik edib.

Prezident İsxak Hersoq Azərbaycanın 2026-2028-ci illərdə də bu quruma sədrliyini davam etdirməsini ölkəmizə göstərilən yüksək etimadın təzahürü kimi qiymətləndirib və məmnunluğunu ifadə edib. O, Azərbaycanın sədrliyi dövründə təşkilat çərçivəsində praktiki əməkdaşlığın genişləndirilməsi və etimad quruculuğu istiqamətində görülən işləri yüksək qiymətləndirib.

Prezident İlham Əliyev verilən dəyərə görə təşəkkürünü bildirərək, Azərbaycanın sədr ölkə kimi üzv dövlətlər arasında qarşılıqlı etimadın möhkəmləndirilməsi və praktiki əməkdaşlığın inkişaf etdirilməsi istiqamətində səylərini bundan sonra da davam etdirəcəyini vurğulayıb.

Görüşdə Azərbaycan ilə İsrail arasında ikitərəfli münasibətlərə, həmçinin beynəlxalq və regional gündəlikdə duran məsələlərə dair geniş fikir mübadiləsi aparılıb.