İlham Əliyev: “Qarabağ Ermənistandır və nöqtə” deyənlər artıq “Qarabağ Azərbaycandır!” deyirlər”

Prezident İlham Əliyev Yeni Azərbaycan Partiyasının VIII Qurultayında çıxışı zamanı mühüm bəyanatlarla çıxış edib.

hadiseler.info xəbər verir ki, dövlət başçısı qazanılan iki hərbi zəfərin təkcə xalqımız və dövlətimiz üçün deyil, bütün dünya üçün böyük önəm daşıdığını vurğulayıb.

Prezident bildirib ki, bu qələbələr böyük güclərin müqaviməti və xarici təzyiqlər fonində əldə olunub:

“1992-ci ildə yaradılmış Minsk qrupunun əsas məqsədi münaqişəni dondurmaq idi, Azərbaycanın ərazi bütövlüyünün bərpasına kömək göstərmək yox. İkinci Qarabağ müharibəsi başlanan gündən 44 gün ərzində bizə qarşı böyük təzyiqlər göstərilmiş, hədə-qorxular səsləndirilmişdir. Ancaq heç kim bizi yolumuzdan döndərə bilmədi”.

İlham Əliyev xalqın birliyini və əldə olunan geosiyasi dəyişikliyi xüsusi qeyd edib:

“Azərbaycan xalqı yumruq kimi birləşərək öz haqqını tələb edirdi və Azərbaycan iqtidarı da bu şərəfli missiyanı yerinə yetirdi. Azərbaycan ciddi bir geosiyasi dəyişikliklərə yol açdı. Vaxtilə “Qarabağ Ermənistandır və nöqtə” deyənlər artıq “Qarabağ Azərbaycandır!” deyirlər. Bunu məcburən deyirlər. Azərbaycanın ərazi bütövlüyünün Ermənistan tərəfindən tanınması, sadəcə olaraq, xoş niyyətin təzahürü deyil və belə sayıla bilməz”.