İlham Əliyev Qaradağda “Qobustan” Günəş Elektrik Stansiyasının açılışında iştirak edib- FOTOLAR

Azərbaycan Prezidenti İlham Əliyev paytaxtın Qaradağ rayonunda 100 MVt gücündə “Qobustan” Günəş Elektrik Stansiyasının açılış mərasimində iştirak edib.

hadiseler.info xəbər verir ki, energetika naziri Pərviz Şahbazov, Çin Xalq Respublikasının ölkəmizdəki səfiri Lu Mey və “Universal International Holdings Limited” şirkətinin baş icraçı direktoru Yi Nan dövlət başçısını qarşılayıblar. Dövlət başçısına stansiya və Çinin “Universal Energy” şirkətinin ölkəmizdəki fəaliyyəti barədə geniş məlumat verilib.

Nazirlər Kabinetinin 2023-cü il qərarı ilə Qaradağ rayonunun Pirsaat qəsəbəsində 300,77 hektar torpaq sahəsi bərpaolunan enerji mənbələri ərazisi kimi müəyyənləşdirilib. 2024-cü ildə keçirilən hərracın qalibi olan Çinin “Universal International Holdings Limited” şirkəti tərəfindən inşa edilən bu obyekt Azərbaycanda hərrac vasitəsilə həyata keçirilən ilk günəş elektrik stansiyası layihəsidir.

Stansiyanın istismara verilməsilə hər il təxminən 200 milyon kilovat-saat elektrik enerjisinin istehsalı proqnozlaşdırılır. Bu layihə ildə 45 milyon kubmetr təbii qaza qənaət etməyə və atmosferə atılan karbon emissiyalarını 97 min ton azaltmağa imkan verəcək. Yeni stansiya ilə birlikdə ölkəmizdə bərpaolunan enerji mənbələrinin ümumi gücü 2170 MVt-a, stansiyaların sayısı isə 85-ə çatıb. 2027-ci ilin sonunadək isə təxminən 1,5 QVt gücündə yeni bərpaolunan enerji layihələrinin reallaşdırılması nəzərdə tutulur.