İrandan Azərbaycana gətirilən 111 kq narkotikin qarşısını aldı

İrandan Azərbaycana böyük miqdarda narkotik vasitənin qanunsuz yolla keçirilməsinin qarşısı alınıb.

hadiseler.info xəbər verir ki, bu barədə Dövlət Sərhəd Xidməti məlumat yayıb.

Bildirilib ki, Sərhəd Qoşunlarının “Horadiz” sərhəd dəstəsinin xidməti ərazisində keçirilmiş sərhəd axtarışı və əməliyyat tədbirləri nəticəsində pilotsuz uçuş aparatı vasitəsilə İrandan ölkə ərazisinə keçirilməyə cəhd edilən ümumi çəkisi 111 kiloqram 200 qram narkotik vasitə aşkar olunaraq dövriyyədən çıxarılıb.

Sentyabrın 22-də 57 kiloqram 500 qram, sentyabrın 24-də isə 53 kiloqram 700 qram narkotik vasitə ələ keçirilib. Faktlar üzrə əməliyyat-istintaq tədbirləri davam etdirilir.