İsveçdə parlament seçkiləri başladı

İsveçdə parlament (Riksdaq) və yerli özünüidarəetmə orqanlarına keçirilən seçkilərdə səsvermə prosesinə start verilib.

hadiseler.info xəbər verir ki, ölkə üzrə seçki məntəqələri yerli vaxtla saat 08:00-da (Bakı vaxtı ilə 10:00) qapılarını seçicilərin üzünə açıb. Seçkilərin ilkin nəticələrinin səsvermə başa çatdıqdan bir saat sonra — saat 21:00-da (Bakı vaxtı ilə 23:00) açıqlanacağı gözlənilir.

Seçicilər hazırkı parlament və hökumətin dördillik səlahiyyət müddətinin bitməsi ilə əlaqədar 349 deputatın yer aldığı birpalatalı Riksdaqa yeni nümayəndələr seçirlər. Mülayimlər Koalisiya Partiyasının lideri və hazırkı Baş nazir Ulf Kristersson ikinci müddətə hökumətə rəhbərlik etmək üçün namizədliyini irəli sürüb. Hazırda Mülayimlər hökumətdəki 17 nazirliyə (o cümlədən XİN və Müdafiə Nazirliyinə), Liberallar 11, Xristian Demokratlar isə 6 nazirliyə rəhbərlik edirlər.

Son rəy sorğuları müxalifət bloku ilə hakim koalisiya arasında kəskin mübarizə getdiyini göstərir. “Demoskop” agentliyinin keçirdiyi son sorğuya əsasən, Sosial-Demokrat İşçi, Sol, Mərkəz və Yaşıllar partiyalarından ibarət müxalifət bloku 50,6% səslə az fərqlə öndədir. Hakim koalisiya (Mülayimlər, Liberallar və Xristian Demokratlar) isə 47,3% dəstəyə sahibdir.