Kaliforniyada təyyarə qəzaya uğrayıb: 2 uşaq həlak olub- VİDEO- FOTO

ABŞ-nin Kaliforniya ştatında kiçik təyyarənin qəzaya uğraması nəticəsində iki uşaq həyatını itirib, iki böyük isə ağır vəziyyətdə xəstəxanaya yerləşdirilib.

hadiseler.info xəbər verir ki, bu barədə “New York Post” və “San Francisco Chronicle” nəşrləri hüquq-mühafizə orqanlarına istinadən məlumat yayıb.

Hadisə Fresno hava limanı yaxınlığında, San-Xoakin çayı ərazisində qeydə alınıb. Göyərtəsində dörd nəfərin olduğu hava gəmisinin qalıqları çayın yaxınlığındakı uçurumda aşkar edilib. Qəza nəticəsində ərazidəki yamacda yanğın da baş verib.

Xəstəxanaya çatdırılan iki yaralının vəziyyəti ağır qiymətləndirilir. Həlak olan uşaqların şəxsiyyəti və dəqiq yaşları hələlik müəyyənləşdirilməyib.

Qəzanın başvermə səbəbləri məlum deyil. Hadisə ilə bağlı ABŞ Federal Aviasiya Administrasiyası (FAA) və Milli Nəqliyyat Təhlükəsizliyi Şurası (NTSB) tərəfindən araşdırmalara başlanılıb.