Kamçatkada sel yolu yudu: Azərbaycan vətəndaşı vulkan ərazisində çarəsiz qaldı

Rusiyanın Kamçatka yarımadasındakı Ploski Tolbaçik vulkanı ərazisində güclü yağışlar nəticəsində avtomobil yolunun 30 kilometrlik hissəsini sel yuyub.

hadiseler.info “Kamçatka-İnform”a istinadən xəbər verir ki, təbii fəlakət səbəbindən “Kleşnya” turist dayanacağının yaxınlığında 100-ə yaxın insan, o cümlədən Azərbaycan vətəndaşı — tanınmış aparıcı Tatyana Dolivets çarəsiz durumda qalıb. Sosial şəbəkə vasitəsilə yardım istəyən T.Dolivets bildirib ki, qrupda Çin, Belarus, İsrail və Rusiya vətəndaşları da var və ərazidəki insanların cəmi 1 günlük ərzaq ehtiyatı qalıb.

Hazırda Rusiya FHN-in Kamçatka üzrə Baş İdarəsinin əməliyyat qrupu fəlakət bölgəsindədir və vəziyyəti qiymətləndirmək üçün pilotsuz aviasiya sistemlərindən (PUA) istifadə edir. Yolun bərpası və turistlərin təxliyyəsi yönündə xilasetmə tədbirləri davam etdirilir.