Kanada alovlar içində: On minlərlə insan təxliyə olundu

Kanadanın Britaniya Kolumbiyası əyalətində tüğyan edən güclü meşə yanğınları səbəbindən regionda fövqəladə vəziyyət elan edilib. Təbii fəlakət nəticəsində 20 minə yaxın sakin təhlükəsiz ərazilərə təxliyə olunub.

“Haber Global”a istinadən Hadisələr.info xəbər verir ki, Britaniya Kolumbiyası əyalətində başlayan meşə yanğınının qısa müddətdə geniş əraziyə yayılması səbəbindən xüsusilə Sammerlend (Summerland) bölgəsində vəziyyət kəskinləşib.

Rəsmi qurumlar təxminən 12 min nəfərin məskunlaşdığı Sammerlend bölgəsinin tamamilə, həmçinin 8 minə yaxın sakini olan Piçlend (Peachland) və ətraf yaşayış məntəqələrinin boşaldılması barədə məcburi təxliyə qərarı verildiyini açıqlayıblar.

Ərazidə yanğınla mübarizə davam etdirilir

Alovun yaşayış məntəqələrinə keçməsinin qarşısını almaq üçün çoxsaylı yanğınsöndürən briqada və xüsusi aviasiya texnikası cəlb olunub. Yüksək temperatur və küləkli hava şəraiti söndürmə işlərini çətinləşdirir.