Kolleclərin boş qalan yerlərinə qəbul nəticələri AÇIQLANDI

Dövlət İmtahan Mərkəzi (DİM) 2026/2027-ci tədris ili üçün ümumi (9 illik) orta təhsil bazasında orta ixtisas təhsili müəssisələrinin (kolleclərin) boş qalan plan yerlərinə qəbul üzrə müsabiqənin nəticələrini elan edib.

hadiseler.info xəbər verir ki, boş qalan plan yerlərinə keçirilən müsabiqədə iştirak etmək üçün 2863 abituriyent müraciət edib və onların arasından 976 şəxs kolleclərə qəbul olub.

Abituriyentlər qəbul nəticələrini DİM-in rəsmi internet səhifəsindən və ya mobil operatorlar (Azercell, Bakcell, Nar) vasitəsilə “iş nömrəsi”ni 7727 nömrəsinə SMS göndərməklə öyrənə bilərlər. Qəbul olanların siyahısı “Abituriyent” jurnalının 10-cu nömrəsində dərc olunacaq, jurnalın elektron PDF versiyası isə günün sonunadək www.abiturient.az saytında yerləşdiriləcək.

Qəbul olunan abituriyentlərin nəzərinə çatdırılır ki, kolleclərə qeydiyyat prosesi yalnız my.gov.az portalı üzərindən elektron qaydada aparılacaq. Elektron qeydiyyat 15 sentyabr saat 15:00-dan 22 sentyabr saat 18:00-dək davam edəcək.

Qeydiyyat üçün şəxslər mygov ID vasitəsilə my.gov.az portalında şəxsi kabinetə daxil olmalı, “Xidmətlər” > “Qurumlar” bölməsindən Elm və Təhsil Nazirliyini seçərək “Ali və orta ixtisas təhsil müəssisələrinə təhsilalanların qeydiyyatı” xidmətinə keçməlidirlər. Müəyyən edilən müddətdə qeydiyyatdan keçməyən abituriyentlər təhsil almaqdan imtina etmiş sayılacaqlar.