Kürdə çayında boğulan 17 yaşlı Gülnaz respublika çempionu imiş

Samux rayonunda Kür çayında boğulan 17 yaşlı qızın meyiti tapılaraq sudan çıxarılıb.  

Hadisələr.info xəbər verir ki, Fövqəladə Hallar Nazirliyinin dalğıc-xilasediciləri tərəfindən Gəncə şəhər sakini, 2009-cu il təvəllüdlü Gülnaz Məmmədovanın cansız bədəni sudan çıxarılaraq aidiyyəti üzrə təhvil verilib.  

Ailəsi ilə birlikdə Kür çayının Samux rayonu Yenikənd kəndi ərazisindən keçən hissəsinə istirahətə gələn Gülnaz bu il 11-ci sinfi bitirmişdi.  

Hadisə ilə bağlı dəhşətli təfərrüat da məlum olub. Mərhumun nənəsi Gülnaz Məmmədova bildirib ki, bədbəxt hadisə nəvələri suda çimərkən baş verib:

“Gözümüz görə-görə nəvəm suda birdən yoxa çıxdı. Oğlum və digər nəvəm dərhal onun arxasınca suya atılsalar da, tapa bilmədilər. Gülnaz elə bilib ki, qardaşı boğulur, onu xilas etmək üçün özünü suya atmışdı”.  

Məlum olub ki, 17 yaşlı Gülnaz Məmmədova idmançı idi. Kikboksinq idman növü ilə peşəkar şəkildə məşğul olan gənc idmançı sonuncu dəfə Gəncədə keçirilən Kikboksinq üzrə XXX Azərbaycan birinciliyində bütün rəqiblərinə qalib gələrək qızıl medal qazanmışdı.  

Faktla bağlı müvafiq qurumlar tərəfindən araşdırmalar davam etdirilir.