Mətbuat Şurasından Türkiyə mediasına ÇAĞIRIŞ

Azərbaycan Mətbuat Şurası Türkiyənin bəzi media resurslarında və sosial şəbəkə platformalarında ölkəmizə qarşı yayılan qərəzli məlumatlarla bağlı bəyanat yayıb.

hadiseler.info xəbər verir ki, sənəddə Azərbaycana qarşı aparılan manipulyativ kampaniyalardan ciddi narahatlıq ifadə olunub.

Bəyanatda bildirilir ki, son günlər Türkiyə mediasında ölkəmizdəki təhsil qaydaları, o cümlədən vahid məktəbli geyimi ilə bağlı qərarlar kontekstdən çıxarılaraq təhrif edilir. Guya Azərbaycanda “hicab qadağası”nın tətbiq olunması və İslami dəyərlərin sıxışdırılması barədə əsassız iddialar yayılaraq məsələ süni şəkildə dini-ideoloji qarşıdurma müstəvisinə daşınmağa çalışılır.

Mətbuat Şurası qeyd edib ki, bəzi ənənəvi media orqanlarında fikir azadlığının sərhədləri aşılır, hətta Azərbaycanın konstitusiya quruluşunun zorla dəyişdirilməsinə çağırış edən şəxslərə tribuna verilir. Bu cür halların “bir millət, iki dövlət” prinsipinə və strateji müttəfiqlik ruhuna zidd olduğu vurğulanıb.

Şura Türkiyənin media qurumlarını, jurnalist təşkilatlarını və rəqəmsal platformalarda fəaliyyət göstərən şəxsləri məlumatları dərc edərkən diqqətli olmağa, faktları yoxlamağa, saxta görüntülərin yayılmasına yol verməməyə və iki ölkə arasındakı münasibətlərə kölgə salan manipulyativ kampaniyalara qarşı prinsipial mövqe sərgiləməyə çağırıb.