Magistraturanın boş yerlərinə nəticələr açıqlandı

Ali təhsil müəssisələrinin magistraturalarının boş qalan plan yerləri üzrə keçirilən müsabiqənin nəticələri elan olunub.

hadiseler.info xəbər verir ki, Dövlət İmtahan Mərkəzinin (DİM) məlumatına görə, nəticələr qurumun rəsmi internet saytında yerləşdirilib. Bakalavrlar nəticələri həmçinin mobil operatorlar (“Azercell”, “Bakcell”, “Nar”) vasitəsilə iş nömrəsini “7727”yə göndərərək öyrənə bilərlər.

Müsabiqədə iştirak edən 1 457 bakalavrdan 508 nəfəri magistraturaya qəbul olunub. Onlardan 82-si təhsilini dövlət sifarişi əsasında alacaq. Qəbul olunanların siyahısı və keçid balları “Magistr” jurnalının 7-ci sayında dərc ediləcək, sabah günün ikinci yarısından isə abiturient.az saytından elektron versiyasını əldə etmək mümkün olacaq.

Qəbul olunan şəxslərin qeydiyyatı yalnız my.gov.az portalı üzərindən aparılacaq. Qeydiyyat sentyabrın 3-ü saat 15:00-da başlayıb sentyabrın 9-u saat 18:00-da başa çatacaq. Müəyyən olunmuş müddətdə qeydiyyatdan keçməyənlər imtina etmiş sayılacaqlar.