Milli Qəhrəman xəstəxanaya yerləşdirildi

Azərbaycanın Milli Qəhrəmanı, Birinci Qarabağ müharibəsi iştirakçısı Ehtiram Əliyevin səhhətində kəskin pisləşmə baş verib.

hadiseler.info xəbər verir ki, bu barədə “Azərbaycan Respublikası Milli Qəhrəmanlarını Tanıtma” İctimai Birliyinin sədri Elşən Uluxanlı məlumat verib.

Məlumata görə, E.Əliyev ağır vəziyyətdə “Yeni Klinika”ya hospitalizasiya olunub, səhhəti daha da ağırlaşdığından Reanimasiya şöbəsinə köçürülüb və dörd gündür intensiv terapiya altındadır.

Elşən Uluxanlı Milli Qəhrəmanın səhhətindəki ağırlaşmanın səbəblərinə toxunaraq bildirib:

“Mədəsində problem var idi. Vaxtında düzgün müalicə olunmadığından qanaxma baş verib. Həkimlərin son məlumatına görə, artıq ağciyərlərində də ciddi problem yaranıb və 50 faizi fəaliyyətini itirib. Düşünürük ki, vaxtında düzgün diaqnoz qoyulmayıb və lazımi müalicə aparılmayıb. Nəticədə vəziyyəti kəskin pisləşib. Həkimlər hazırda vəziyyətində bir dəyişiklik olmadığını, ağır olaraq qaldığını bildirirlər.”

Qeyd edək ki, 1972-ci il avqustun 1-də Ucar rayonunun Qazyan kəndində anadan olan Ehtiram Əliyev Birinci Qarabağ müharibəsində göstərdiyi rəşadətə görə Azərbaycanın Milli Qəhrəmanı adına layiq görülüb.