MİQ müsabiqəsindən sonra 3 minə yaxın vakant yer qalıb

Müəllimlərin işə qəbulu (MİQ) müsabiqəsinin əsas yerləşdirmə mərhələlərindən sonra 3 minə yaxın vakant yer tutulmamış qalıb.

hadiseler.info xəbər verir ki, bu barədə Məktəbəqədər və Ümumi Təhsil üzrə Dövlət Agentliyinin (MÜTDA) direktoru Eşqi Bağırov İctimai Televiziyada yayımlanan “Pressinq” verilişində məlumat verib.

Eşqi Bağırov bildirib ki, bu göstərici həmin yerlərin tamamilə vakant qalması demək deyil. Bu il 6 minə yaxın müəllim MİQ müsabiqəsində uğur qazanaraq məktəblərdə fəaliyyətə başlayıb və vakansiyaların doldurulması prosesi hazırda da davam etdirilir.

MÜTDA direktoru xüsusilə ucqar kənd məktəblərində və az saatlı fənlər üzrə müəllim çatışmazlığının yarandığını qeyd edib. Həmin yerlərin təmin olunması üçün aşağıdakı addımlar atılır:

 Ehtiyat namizədlər: Müsabiqədə keçid balını toplamış namizədlərlə müqavilə əsasında vakansiyalar doldurulur.

 Əvəzçilik qaydası: Qonşu məktəblərdən müvafiq fənn müəllimləri əvəzçiliklə dərs saatlarına cəlb olunur.

 Yeni işəqəbul: Yerli təhsil idarəetmə orqanlarına verilmiş təlimatlar əsasında yeni müəllimlərin cəlb edilməsi təmin olunur.