Moldova Rusiyadakı səfirini geri çağırdı

Moldovanın Rusiyadakı fövqəladə və səlahiyyətli səfiri Lilian Dariy məsləhətləşmələr üçün təcili olaraq geri çağırılıb.

hadiseler.info xəbər verir ki, bu barədə Moldova Xarici İşlər Nazirliyinin (XİN) rəsmi “Telegram” kanalında məlumat dərc olunub.

Diplomatik addımın atılmasına ölkənin Ştefan Voda rayonu ərazisinə pilotsuz uçuş aparatının (dron) düşərək partlaması səbəb olub.

Moldova XİN-in açıqlamasında bildirilir: “Yaranmış vəziyyətlə əlaqədar Xarici İşlər Nazirliyi Moldova Respublikasının Moskvadakı səfirini məsləhətləşmələr aparmaq üçün geri çağırır”.

Xatırladaq ki, avqustun 9-da Moldovanın Ukrayna ilə sərhəddə yerləşən Krozmaz kəndi yaxınlığında dron qalıqları aşkar edilib və həmin ərazidə partlayış baş verib. Hadisə zamanı xəsarət alanların olmadığı bildirilir.