Məzarı açılan Kozinoğlunun saç və dırnaq nümunələrində ölümcül maddə aşkarlandı

Türkiyənin keçmiş Milli Kəşfiyyat Təşkilatının (MİT) əməkdaşı Kaşif Kozinoğlunun açılan məzarından götürülən nümunələr üzrə Məhkəmə Tibb Qurumunun apardığı ilkin araşdırmanın nəticələri açıqlanıb.

hadiseler.info xəbər verir ki, aparılan autopsiya və laborator analizlərin nəticəsində K.Kozinoğlunun saç və dırnaq nümunələrində yüksək miqdarda toksik maddə müəyyən edilib. Eyni zamanda, aparılan yoxlamalar zamanı məzar torpağında heç bir zəhərli maddəyə rast gəlinmədiyi bildirilib.

Dəqiq ölüm səbəbinin əks olunacağı Məhkəmə Tibb Qurumu Ali Şurasının yekun hesabatının prokurorluğa təqdim olunması gözlənilir.

Xatırladaq ki, “Ergenekon” işi üzrə 2011-ci il martın 10-da həbs edilən Kaşif Kozinoğlu ilk məhkəməsinə 10 gün qalmış – həmin il noyabrın 12-də Silivri həbsxanasında vəfat etmişdi. Rəsmi açıqlamada onun ürək tutmasından öldüyü bildirilmişdi. Sentyabr ayında ölüm faktı ilə bağlı başlanan yenidənqurma istintaqı çərçivəsində məzarının açılması qərara alınmış, 9 şübhəli saxlanılmışdı ki, onlardan 3-ü həbs olunmuşdu. İstintaq dövründə saxlanılaraq sonradan azadlığa buraxılan keçmiş həbsxana həkimi Turgay Tamer də sentyabr ayında İstanbuldakı evində ölü tapılmışdı.