Nepalda iki helikopter toqquşdu- Ölən və yaralananlar var

Nepalda, Everest bölgəsindəki Periçe kəndində iki helikopter eniş edərkən havada toqquşub.

hadiseler.info xəbər verir ki, hadisə nəticəsində 1 turistin həlak olduğu, 3 nəfərin isə yaralandığı rəsmən təsdiqlənib. Yerli polisin yaydığı məlumata əsasən, həlak olan şəxsin Hindistan vətəndaşı olduğu dəqiqləşdirilib. Yaralanan hindistanəsilli Yeni Zelandiya vətəndaşı isə hava yolu ilə xəstəxanaya çatdırılıb. Hər iki helikopterin pilotu yüngül xəsarətlər alaraq müalicə üçün Katmanduya aparılıb.

Məlumata görə, “Fishtail Air” və “Air Dynasty” şirkətlərinə məxsus helikopterlər “Edelweiss Pheriche” hotelinin yaxınlığındakı eyni eniş meydançasına enmək istəyərkən toqquşublar. Zərbənin təsirindən hər iki hava gəmisi yerə çırpılıb. Hadisə yerinin yaxınlığında onlarla turistin olması və qəza zamanı qalıqların onların istiqamətinə uçması təhlükəli anlar yaşadıb.

Faktla bağlı araşdırma aparılır, toqquşmanın dəqiq səbəbləri dəqiqləşdirilir.