Paytaxt parklarında açıq hava konsertləri başladı 

Bakı Şəhər İcra Hakimiyyəti və rayon İcra Hakimiyyətlərinin birgə təşkilatçılığı ilə paytaxt sakinlərinin asudə vaxtının daha səmərəli və mənalı təşkili məqsədilə açıq hava konsertlərinə start verilib.

Hadisələr.info xəbər verir ki, şənbə günündən etibarən Bakının dörd müxtəlif rayonunda yerləşən park və istirahət məkanları rəngarəng musiqi axşamlarına ev sahibliyi etməyə başlayıb.

Konsert proqramları Xətai rayonundakı Nizami Gəncəvi parkında, Nərimanov rayonunda “Gənclik” metro stansiyasının yaxınlığındakı parkın amfiteatrında, Yasamal rayonunun Meşə parkında və Nizami rayonundakı Heydər Əliyev parkında təşkil olunub.

Peşəkar və gənc ifaçıların yer aldığı tədbirlərdə estrada, xalq və klassik musiqi nümunələri, həmçinin rəngarəng instrumental ifalar səsləndirilib. Canlı performanslar və xoş atmosfer parklara istirahətə gələn sakinlər tərəfindən böyük maraq və alqışlarla qarşılanıb.

Musiqi proqramlarının repertuarı hər həftə yenilənəcək və yay mövsümü boyunca hər şənbə günü davam etdiriləcək.