Polşada konstitusiya Məhkəməsinin rəhbərliyi uzaqlaşdırıldı

Polşada Konstitusiya Məhkəməsinin sədri Boqdan Sveçkovski və onun müavini Bartlomey Sohanski vəzifələrindən uzaqlaşdırılıb. Bu qərardan dərhal sonra ölkədə siyasi gərginlik pik həddə çatıb, məhkəmə binası polis tərəfindən mühasirəyə alınıb.

hadiseler.info xəbər verir ki, hazırda məhkəmənin idarəçiliyini ən yüksəkvəzifəli hakim Anna Korvin-Piotrovska üzərinə götürüb.

Məhkəmə rəhbərliyinin kənarlaşdırılması ölkədə diplomatik qalmaqala da səbəb olub. Polşanın Pekindəki səfiri Yakub Kumoç baş verənlərə etiraz olaraq dərhal istefa verib və səfir kimi fəaliyyətini davam etdirə bilməyəcəyini bəyan edib. Xarici işlər naziri Radoslav Sikorski isə diplomata sərt reaksiya göstərərək onun səlahiyyətlərinin qeyri-peşəkar şəkildə başa çatdığını və artıq dövləti təmsil etmədiyini bildirib.

Qərarın elan olunmasından sonra müxalifətdə olan Hüquq və Ədalət Partiyasının (PiS) lideri Yaroslav Kaçinski, keçmiş baş nazir Mateuş Moravetski və məhkəmənin sabiq sədri Yuliya Pjılebska başda olmaqla, çox sayda insan binanın qarşısına toplaşıb. Hasarları aşmağa çalışan və hüquq-mühafizə əməkdaşlarına müxtəlif əşyalar atan etirazçılardan 3 nəfər saxlanılıb.

Baş nazir Donald Tusk isə kənarlaşdırma qərarını müdafiə edərək bildirib: “Qanunun aliliyini bərpa etmək bizim borcumuzdur. İllərlə davam edən qanunsuzluqdan sonra bu, qətiyyətli addımlar tələb edən ağrılı bir prosesdir”.