Prezident: “Bizim tanklarda Bakıya gələcəklərini deyənlər bu gün çayımızı həbsxanalarımızda içirlər”

Bakıda keçirilən Asiyada Qarşılıqlı Fəaliyyət və Etimad Tədbirləri üzrə Müşavirənin (AQEM) 7-ci Zirvə Toplantısında çıxış edən Azərbaycan Respublikasının Prezidenti İlham Əliyev Ermənistanın işğalçılıq siyasəti, beynəlxalq ikili standartlar və Azərbaycanın ərazi bütövlüyünü tam bərpa etməsi barədə kəskin və mühüm bəyanatlar verib.

hadiseler.info xəbər verir ki, dövlət başçısı Ermənistanın keçmiş və indiki rəhbərliyinin cinayətkar əməllərini və beynəlxalq qurumların laqeydliyini sərt tənqid edib:

“Ermənistanın əvvəlki rəhbərliyi – Ermənistanın hər üç keçmiş prezidenti və onların tərəfdarları, bu müharibə cinayətkarları və uşaq qatilləri hələ də layiq olduqları cəzanı almayıblar. Ermənistanın hazırkı rəhbərliyi 2018-ci ildən etibarən sələflərinin cinayətkar siyasətini davam etdirmişdir. Hazırkı Baş nazir 2019-cu ildə o vaxt işğal altında olan Xankəndidə “Qarabağ Ermənistandır və nöqtə” bəyan etmişdir. Bütün bu hədsiz həyasızlığa beynəlxalq ictimaiyyət göz yumurdu.

Beynəlxalq münasibətlərdə anaxronizm və atavizmin iki nümunəsi olan Avropa Parlamenti və Avropa Şurası davamlı təcavüz qurbanı olan Azərbaycanı hədəfə alırdı və təcavüzkar Ermənistanı həvəsləndirirdi. Münaqişənin həlli üçün yaradılmış ATƏT-in Minsk qrupu isə həmsədrlər tərəfindən iflic vəziyyətə salınmışdı”.

“Azərbaycan əsgərinin ‘Dəmir yumruğu’ yenidən öz sözünü dedi”

2020-ci il Vətən müharibəsində əldə olunan tarixi Qələbədən və 2023-cü ilin sentyabrında həyata keçirilən lokal antiterror tədbirlərindən danışan Prezident İlham Əliyev separatçılığa birdəfəlik son qoyulduğunu vurğulayıb:

“Bir sutkadan da az müddətdə Ermənistanın Qarabağdakı işğalçı ordusu tamamilə darmadağın edildi. Azərbaycan öz suverenliyini və ərazi bütövlüyünü tam bərpa etdi, separatizmə son qoydu. Separatçıların liderləri, müharibə cinayətkarları və uşaq qatilləri isə Azərbaycan məhkəməsi qarşısına gətirildi. Bu, mahiyyətinə və formasına görə Nürnberq tribunalının analoqu idi”.

“Tanklarda gəlib Bakıda çay içəcəklərini deyənlər həbsxanadadırlar”

Dövlətimizin başçısı işğalçıların layiqli cəzalarını aldıqlarını və Bakıdakı qonaqları Hərbi Qənimətlər Parkını ziyarət etməyə dəvət etdiyini xüsusi vurğulayıb:

“Tanklarda gəlib Bakını işğal edəcəkləri və burada çay içəcəkləri ilə bizi təhdid edənlər bu gün Azərbaycan çayını bizim həbsxanalarda içirlər. Onların tankları isə Hərbi Qənimətlər Parkında nümayiş olunur. Yeri gəlmişkən, işğalın, eləcə də Azərbaycan xalqının tarixi Qələbəsinin mahiyyətini və xarakterini tam anlamaq üçün qonaqlarımız Zəfər parkını, Zəfər muzeyini və Hərbi Qənimətlər Parkını ziyarət edə bilərlər”.