Prezident İlham Əliyev Azərbaycanın yəhudi icmasını təbrik edib

Azərbaycan Respublikasının Prezidenti İlham Əliyev yəhudi xalqının əlamətdar bayramı olan Roş ha-Şana münasibətilə ölkəmizin yəhudi icmasına təbrik məktubu ünvanlayıb.

hadiseler.info xəbər verir ki, dövlət başçısı məktubunda tarixən müxtəlif sivilizasiyaların qovuşduğu Azərbaycanın etnik-dini tolerantlıq mühitini, ayrı-ayrı xalqların və etiqadların nümayəndələri arasında dostluq və qardaşlıq münasibətlərini yüksək qiymətləndirib.

Prezident İlham Əliyev müasir Azərbaycanda hər bir vətəndaşın fundamental insan haqlarının təmin edildiyini vurğulayıb. O, yəhudi icmasının öz milli-mənəvi dəyərlərini, dil və mədəniyyətini qoruyub-saxlamaqla ölkəmizin sosial-mədəni həyatında yaxından iştirak etdiyini və vətəndaş həmrəyliyinin möhkəmlənməsinə özünəməxsus töhfələr verdiyini diqqətə çatdırıb. Dövlətimizin başçısı yeniliyin, mənəvi saflığın və xeyirxahlığın rəmzi olan bayram münasibətilə yəhudi icmasının hər bir üzvünə xoşbəxtlik və xeyir-bərəkət arzulayıb.