Prezident və Kadırov “Bakı Ağ Şəhər”də oldular — FOTOLAR

Azərbaycan Respublikasının Prezidenti İlham Əliyev və Rusiya Federasiyası Çeçenistan Respublikasının başçısı Ramzan Kadırov oktyabrın 10-da “Bakı Ağ Şəhər” ərazisində olublar.

hadiseler.info xəbər verir ki, “Bakı Ağ Şəhər” layihəsinin icraçı direktoru Ruslan Sadıxov Çeçenistan başçısına burada yaradılmış müasir şərait barədə ətraflı məlumat verib.

Görüşdə qeyd olunub ki, ərazi əvvəllər neft sənayesi tullantıları ilə çirklənmiş “Qara şəhər” kimi tanınıb. Prezident İlham Əliyevin təşəbbüsü ilə icra olunan dünya miqyaslı nadir ekoloji layihə sayəsində bura müasir yaşayış massivinə çevrilib.

Xatırladaq ki, “Bakı Ağ Şəhər” layihəsinin icrasına Prezident İlham Əliyev və birinci xanım Mehriban Əliyevanın iştirakı ilə 2011-ci il dekabrın 24-də start verilib. Layihə ekoloji cəhətdən təmiz, dayanıqlı və “ağıllı şəhər” prinsipləri əsasında reallaşdırılıb.