Putinin qaz kəmərinin adını dəyişməsi Çində çaşqınlıq yaratdı

Rusiya Prezidenti Vladimir Putinin “Sibirin gücü 2” qaz kəmərinin adını “Baykalın gücü” olaraq dəyişdirmək qərarı Çin mediasında təəccüblə qarşılanıb.

hadiseler.info Çinin “Baijiahao” nəşrinə istinadən xəbər verir ki, yerli ekspertlər bu addımın rəsmi Pekin üçün nəzərdə tutulan gizli bir siyasi mesaj ola biləcəyini ehtimal edirlər.

Rusiyanın bu addımı Putinin Şanxay Əməkdaşlıq Təşkilatının (ŞƏT) Bişkekdə keçirilən sammitində Çin Xalq Respublikasının sədri Si Cinpinlə görüşündən sonra bəlli olub. Rusiyanın energetika naziri Sergey Tsivilyov Şərq İqtisadi Forumunda təsdiqləyib ki, “Sibirin gücü 2” layihəsi məhz prezidentin şəxsi təşəbbüsü ilə “Baykalın gücü” adlandırılıb. Bununla belə, qaz kəmərinin texniki göstəriciləri və marşrut xətti dəyişməz olaraq qalır.

Çinli analitiklərin fikrincə, Rusiya kəmərə daxili su hövzəsinin adını verməklə Pekinə yalnız bir alıcıdan asılı olmadığını nümayiş etdirmək və layihənin ölkənin daxili ehtiyaclarını da ödəyə biləcəyini vurğulamaq istəyir. Lakin məsələ ilə bağlı nə Moskva, nə də Pekin tərəfindən hər hansı rəsmi izahat verilməyib.