“Qaçqınkom” köçlə bağlı narazılıqlara cavab verdi – RƏSMİ AÇIQLAMA

Böyük Qayıdışın təşkili zamanı şəxsi maraq və tələbləri mövzuс qanunvericilik çərçivəsində yerinə yetirilməsi mümkün olmayan bəzi şəxslər müxtəlif internet resurslarında qərəzli paylaşımlar edir, cəmiyyətdə Böyük Qayıdış prosesinin gedişinə, Qaçqınların və Məcburi Köçkünlərin İşləri üzrə Dövlət Komitəsinin və onun əməkdaşlarının nüfuzuna xələl gətirən yanlış fikirlər formalaşdırmağa cəhd göstərirlər.

hadiseler.info Bakıvaxtı.az-a istinadən xəbər verir ki, bu barədə Qaçqınların və Məcburi Köçkünlərin İşləri üzrə Dövlət Komitəsinin mətbuat xidmətindən məlumat verilib.

Açıqlamada bildirilib ki, sosial şəbəkələrdə müxtəlif iddialarla çıxış edən Nuranə Abdullayeva vəfat etmiş atasına vaxtilə Ağdam şəhərində məxsus olmuş yaşayış evinin əvəzinə həmin şəhərdə yeni tikilən binalarda mənzil verilməsini, eyni zamanda Ağdamda yaşayış sahəsi ayrılmadığı təqdirdə Bakı şəhərində müvəqqəti yaşayış yeri və ya yataqxana ilə təmin olunmasını tələb edib.

Araşdırma zamanı N.Abdullayevanın məcburi köçkün statusuna malik olmayan Bakı şəhər sakini ilə nikahda olduğu müəyyən edilib və qanunvericiliyə əsasən istədiyiniz formada yaşayış sahəsi ilə təmin olunması üçün hüquqi əsasın olmadığı ona dəfələrlə izah olunub. Buna baxmayaraq, məsələ sosial şəbəkələrdə, xüsusən “Kanal 15 TV” loqolu materiallarda emosional müstəvidə, Komitənin rəsmi mövqeyi öyrənilmədən tərəfli şəkildə təqdim edilib.

Komitənin məlumatında həmçinin qeyd olunub ki, Xocalı rayonunun Cəmilli kəndində daimi qeydiyyatda olan keçmiş məcburi köçkün İntiqam Türbəndəyev də analoji qərəzli paylaşımlar edir. Komitənin məsul şəxsləri tərəfindən qəbul edilən İ.Türbəndəyevə Xanyurdu kəndində ailə tərkibinə uyğun 3 otaqlı fərdi ev təklif edilsə də, o, qanunla müəyyən olunmuş meyarları nəzərə almadan öz seçdiyi 5 otaqlı evin ona verilməsini israrla tələb edib. Tələbi təmin olunmadıqdan sonra isə sosial şəbəkələrdə böhtan xarakterli məlumatlar yayaraq Böyük Qayıdış proqramına kölgə salmağa cəhd göstərib.

Dövlət Komitəsi bir daha bəyan edib ki, Böyük Qayıdış Proqramı çərçivəsində bütün qərarlar yalnız Azərbaycan Respublikasının qanunvericiliyinə uyğun qəbul edilir və heç bir müraciət qanunvericilikdən kənar qaydada həll edilə bilməz.