Qara dənizdə gəmi hücumu: Yaralanan Azərbaycan vətəndaşı var

Qara dənizdə Bolqarıstan sahili yaxınlığında göyərtəsində Azərbaycan vətəndaşlarının da olduğu “CHELSEA-3” adlı yük gəmisinin dron hücumuna məruz qalması ilə bağlı Xarici İşlər Nazirliyi rəsmi açıqlama yayıb.

hadiseler.info xəbər verir ki, XİN-in Mətbuat xidməti idarəsinin rəisi Ayxan Hacızadə hücum zamanı 15 nəfərlik gəmi heyətində olan 8 nəfər həmyerlimizin hamısının xilas edildiyini bildirib.

Məlumata görə, xilas edilənlərdən bir nəfər — 1993-cü il təvəllüdlü Ramin Rauf oğlu Qəmbərli yaralanaraq Bolqarıstanın Varna şəhərindəki hərbi hospitala yerləşdirilib və səhhəti nəzarətdə saxlanılır. Digər 7 nəfər Azərbaycan vətəndaşı ilkin tibbi müayinədən keçib, onların vəziyyəti qənaətbəxş qiymətləndirilir.

XİN tərəfindən ölkəmizin diplomatik nümayəndəlikləri və aidiyyəti qurumlarla koordinasiyalı şəkildə həmyerlilərimizə zəruri tibbi, konsulluq dəstəyinin göstərilməsi və onların Vətənə təhlükəsiz qayıdışının təşkili üçün bütün tədbirlər görülür.

Nazirlik bir daha Azərbaycan vətəndaşlarına müraciət edərək, hərbi əməliyyatların getdiyi riskli bölgələrə, xüsusilə Qara dəniz və Azov dənizi akvatoriyalarında hərəkət edən gəmilərdə fəaliyyət göstərməkdən çəkinməyi tövsiyə edib.