Qarabağ Universiteti böyüyür: Şuşa və Xocalıda yeni fakültə binaları tikilir

2024-cü ildə ilk tədris ilinə 6 fakültə, 27 ixtisas proqramı və 1 154 tələbə ilə başlayan Qarabağ Universiteti bu gün fəaliyyət miqyasını kəskin şəkildə genişləndirib.

hadiseler.info xəbər verir ki, bu barədə Elm və Təhsil Nazirliyi məlumat yayıb.

Hazırda ali təhsil müəssisəsi 9 fakültə üzrə 49 ixtisasda mühəndislik, biznes, tibb, pedaqogika, incəsənət və təbiət elmləri istiqamətində kadr hazırlığı həyata keçirir. Təhsilin tamamilə dövlət sifarişi əsasında aparıldığı universitetdə bütün tələbələr pulsuz yataqxana və kommunal xidmətlərlə təmin olunublar.

Universitetin coğrafiyası və infrastrukturu daha da genişləndirilir. Layihə çərçivəsində Xankəndidə mühəndislik, riyaziyyat, sosial elmlər, Şuşada İncəsənət, Xocalıda isə Kənd Təsərrüfatı fakültələri üçün yeni tədris binaları inşa olunur. Həmçinin universitetin Klinikası ilə birgə fəaliyyət göstərən Tibb və sağlamlıq fakültəsi gələcəyin həkimləri üçün müasir akademik-kliniki mərkəzə çevrilib.