Qarabağ Universitetinin yüksək nəticə göstərən tələbələrinə 100 gedişlik “CityCard Xankəndi” hədiyyə olunub

“BakıKart” tərəfindən gənclərin təhsildə qazandıqları uğurların təşviqi və gündəlik ictimai nəqliyyat xərclərinə dəstək göstərmək məqsədilə Qarabağ Universitetində xüsusi görüş keçirilib.

hadiseler.info xəbər verir ki, görüş çərçivəsində Qarabağ Universitetinə qəbul zamanı ən yüksək nəticə göstərən 20 tələbəyə ictimai nəqliyyatda istifadə üçün nəzərdə tutulan 100 gedişlik “CityCard Xankəndi” hədiyyə kartları təqdim olunub. Kartları “BakıKart”ın İctimaiyyətlə əlaqələr üzrə mütəxəssisi Aynur Kərimli tələbələrə təhvil verib.

Tədbirdə Qarabağ Universitetinin prorektoru Rüstəm İsgəndərli ali təhsil müəssisəsinin fəaliyyəti, tələbələr üçün yaradılan imkanlar və tədris mühiti haqqında geniş məlumat verib. Görüş əsnasında gənclərin təhsildə uğurlarının təşviqi, tələbələrə dəstək və onların gündəlik həyatında ictimai nəqliyyat imkanlarının əlçatanlığı ilə bağlı fikir mübadiləsi aparılıb.

“BakıKart” nümayəndələri yüksək nəticə göstərən tələbələri təbrik edərək onlara yeni tədris ilində uğurlar arzulayıblar. Təqdim olunan 100 gedişlik “CityCard Xankəndi” kartları tələbələrin Xankəndi şəhərində ictimai nəqliyyatdan gündəlik rahat istifadəsinə xidmət edəcək.

Görüşün sonunda tələbələrlə xatirə fotosu çəkdirilib.

Qeyd edək ki, “BakıKart” ictimai nəqliyyatda müasir ödəniş həllərinin tətbiqi ilə yanaşı, gənclərin və tələbələrin dəstəklənməsinə yönələn sosial layihələrə də xüsusi önəm verir.