Qırğızıstanda qoç 1 milyon dollara satılıb

Qırğızıstanda keçirilən beynəlxalq festival çərçivəsində ətlik-piylik “Araşan” cinsindən olan qoç 1 milyon dollara alıcı tapıb.

hadiseler.info xəbər verir ki, iri məbləğli sövdələşmə Qırğızıstan, Rusiya, Qazaxıstan, Özbəkistan və Tacikistandan olan fermerlərin iştirak etdiyi beynəlxalq tədbirdə baş tutub. Satılan heyvan 2023-cü ildə Qazaxıstandan 150 min dollara alınmış “Frenkel” ləqəbli qoçun nəslindəndir.

Qırğızıstan Kənd Təsərrüfatı Nazirliyinin məlumatına görə, “Araşan” cinsi 2021-ci ildə rəsmi qeydiyyata alınsa da, seleksiya işlərinə 1970-ci illərdə Çuy vilayətində başlanılıb. Tacikistandan gətirilmiş Hisar qoçları və yerli qaba yunlu ana qoyunların cütləşdirilməsi ilə yaradılan bu cins zərif əti, yüksək quyruq piyi məhsuldarlığı və həm dağlıq, həm də çöl şəraitinə davamlılığı ilə fərqlənir.