Qızıla yatırım edənlər PUL İTİRƏ BİLƏR: Ekspertdən xəbərdarlıq

Qızıl uzun illərdir yığımları qorumaq üçün etibarlı vasitə hesab olunsa da, bu investisiya növü hər zaman mənfəət vəd etmir. Qiymət dəyişiklikləri səbəbindən qızıla yatırım edən şəxslərin vəsaitlərinin bir hissəsini itirmək riski mövcuddur.

Mövzu ilə bağlı hadiseler.info– ya müsahibə verən iqtisadçı Xalid Kərimli qızılın da digər investisiya alətləri kimi risk daşıdığını və gəlir gətirəcəyinə 100 faiz zəmanət olmadığını bildirib. Ekspertin sözlərinə görə, ilin əvvəlindən qızıla yatırım edənlər təxminən 5 faizə qədər gəlir itkisi ilə üzləşə bilərdilər.

İqtisadçı investisiya portfelində qızıla müəyyən pay ayrılmasını məqsədəuyğun hesab etsə də, bütün vəsaiti yalnız bu sahəyə yatırmağın riskli olduğunu vurğulayıb.

İnvestisiya üçün hansı qızıl alınmalıdır?

Xalid Kərimli qızılı ziynət əşyası formasında almağın investisiya baxımından əlverişsiz olduğunu qeyd edib. Bunun əvəzinə külçə, sikkə və ya qızılın qiymətini izləyən qiymətli kağızlara üstünlük verilməsi tövsiyə olunur. Ziynət əşyalarının satışında maliyyə itkisi yarana bilər; çünki alıcı tapmaq çətinləşə, dizayn dəbdən düşə və ya zövqlərə uyğun gəlmədikdə məhsul daha aşağı qiymətə satıla bilər.

Qızıla yatırımın əsas riski nədir?

Qızılın dividendlər və ya faiz gəliri gətirmədiyini xatırladan ekspert, investorun qazancının yalnız qiymət artımından asılı olduğunu bildirib. Dünya bazarlarında qiymətlərə çoxsaylı amillər təsir etdiyindən, gözlənilən artım baş verməyə, hətta qiymətlər aşağı düşərək investorun vəsait itirməsinə səbəb ola bilər.