Rusiya ilə sərhəddə 200 kilometrlik hasar tikdilər

Finlandiya Rusiya ilə dövlət sərhədində 200 kilometr uzunluğunda müdafiə və müşahidə hasarının tikintisini başa çatdırıb.

hadiseler.info xəbər verir ki, bu barədə ölkənin daxili işlər naziri Mari Rantanen “Yle” teleradiosuna verdiyi bəyanatda bildirib.

Nazir vurğulayıb ki, Şengen zonasının üzvü olan Finlandiya xarici sərhədlərin təhlükəsizliyinə görə öz məsuliyyətini dərk edir: “Hasar sadəcə simvolik tikili deyil, Finlandiyanın sərhəd təhlükəsizliyinin praktik və zəruri hissəsidir”. Rantanen Avropada təhlükəsizlik mühitinin ciddi şəkildə dəyişdiyini qeyd edərək gələcəkdə Rusiya ilə sərhəddə əlavə sədd sahələrinin tikilməsinin istisna olunmadığını əlavə edib.

Xatırladaq ki, tikintisinə 2023-cü ilin martında başlanılan sərhəd infrastruktur layihəsi çərçivəsində Rusiya ilə 1300 kilometrlik quru sərhədinin 200 kilometrlik hissəsində 4,4 metr hündürlüyündə hasar, texniki müşahidə sistemləri və xüsusi yol şəbəkəsi qurulub. Rəsmi Helsinki, həmçinin üçüncü ölkə miqrantlarının kütləvi axınını əsas gətirərək 2023-cü ildən etibarən Rusiya ilə sərhəddəki bütün 8 sərnişin keçid məntəqəsini bağlayıb.