Səbaildə restoranda yanğın baş verib – VİDEO

Bakı şəhərinin Səbail rayonunda yerləşən ictimai iaşə obyektlərindən birində yanğın hadisəsi qeydə alınıb.

hadiseler.info xəbər verir ki, hadisə paytaxtın Əziz Əliyev küçəsində baş verib.

Fövqəladə Hallar Nazirliyindən (FHN) bildirilib ki, daxil olan məlumatla əlaqədar nazirliyin Dövlət Yanğından Mühafizə Xidmətinin qüvvələri dərhal əraziyə cəlb olunub.

Yanğınsöndürənlərin operativ və çevik müdaxiləsi sayəsində dördmərtəbəli yaşayış binasının birinci mərtəbəsində fəaliyyət göstərən restoranın mətbəxində başlayan yanğının genişlənməsinə imkan verilməyib və alov qısa müddətdə söndürülüb.

Hadisə nəticəsində ümumi sahəsi 200 kvadratmetr olan restoranın mətbəxindəki sobada yağ qalıqları yanıb. Operativ tədbirlər sayəsində restoranın qalan hissəsi və dördmərtəbəli yaşayış binası yanğından mühafizə olunub.

Hadisə zamanı xəsarət alan olmayıb.