Sabah bəzi rayonlarda leysan yağacaq, dolu düşəcək – Hava xəbərdarlığı

Avqustun 10-da ölkə ərazisində gözlənilən hava şəraiti açıqlanıb. Milli Hidrometeorologiya Xidmətindən verilən məlumata görə, Bakıda və Abşeron yarımadasında havanın əsasən yağmursuz keçəcəyi gözlənilir. Mülayim şimal-qərb küləyi arabir güclənəcək.
Paytaxtda və yarımadada havanın temperaturu gecə 23-27° isti, gündüz 29-33° isti olacaq. Atmosfer təzyiqi 756 mm civə sütunu, nisbi rütubət isə gecə 70-75 %, gündüz 40-45 % təşkil edəcək.
Azərbaycanın əsasən dağlıq və dağətəyi rayonlarında isə havanın fasilələrlə yağışlı olacağı gözlənilir. Ayrı-ayrı yerlərdə yağışların qısamüddətli leysan xarakterli olacağı, şimşək çaxacağı və dolu düşəcəyi ehtimalı var. Gecə və səhər saatlarında bəzi dağlıq ərazilərdə arabir duman müşahid olunacaq. Mülayim qərb küləyi əsəcək.
Rayonlarda havanın temperaturu gecə 22-27° isti, gündüz 32-37° isti, dağlarda isə gecə 15-20° isti, gündüz 22-27° isti təşkil edəcək.