Salah sürücülük hüququndan məhrum edildi

Böyük Britaniyanın Uorrinqton Məhkəməsi Türkiyənin “Trabzonspor” klubunda və Misir milli komandasında çıxış edən Məhəmməd Salah barəsində qərar çıxarıb.  

hadiseler.info xəbər verir ki, 34 yaşlı hücumçu 6 ay müddətinə sürücülük hüququndan məhrum olunub.

Məhkəmə sənədlərinə əsasən, hadisə martın 27-də Uilmslou şəhərində baş verib. Radarlar sürət həddinin aşılmasını qeydə alarkən “Rolls-Royce” avtomobilinin sükanı arxasında kimin olduğunu polisə bildirməyən Salah prokurorluğun xəbərdarlıqlarına cavab verməyib və istintaqla razılaşmaya getməyib. Məhkəmənin qərarı ilə misirli futbolçu, hüquqdan məhrumetmə ilə yanaşı, 1 044 funt-sterlinq (təxminən 1 217 avro) məbləğində cərimə olunub.  

Qeyd edək ki, 2017-ci ildən “Liverpul”da çıxış edən ulduz futbolçu yol hərəkəti qaydalarını İngiltərə klubundan ayrıldığını açıqladıqdan bir neçə gün sonra pozub. Avqust ayında isə o, azad agent kimi “Trabzonspor”a transfer olunub.