Şiddətli töhmət alan baş həkimə direktor vəzifəsi həvalə edilib? – TƏBİB-dən açıqlama

Qəbələ Rayon Mərkəzi Xəstəxanasının direktor müavini Fikrət Cəfərova direktor vəzifəsinin icrası həvalə edilib. Bu barədə Bizim.Media məlumat yayıb.

Tibbi Ərazi Bölmələrini İdarəetmə Birliyindən (TƏBİB) Hadiseler.info-nun sorğusuna cavab olaraq bildirilib ki, Fikrət Cəfərovun direktor vəzifəsinə təyin edilməsi ilə bağlı yayılan məlumat həqiqəti əks etdirmir.

Qurumdan qeyd olunub ki, xidməti zərurətlə əlaqədar direktor vəzifəsinin icrası müvəqqəti olaraq ona həvalə edilib.

Xatırladaq ki, Fikrət Cəfərova oktyabrın 8-də TƏBİB-in əvvəlki icraçı direktoru Anar Bayramovun əmri ilə sonuncu xəbərdarlıqla şiddətli töhmət verilib. Nəşrin məlumatına görə, buna səbəb TƏBİB-in Daxili nəzarət və monitorinq departamentinin araşdırması zamanı aşkarlanan əmək və icra intizamı pozuntuları olub.