Sumqayıtdakı qətlin ŞOK TƏFƏRRÜATI: Qatil Vətən müharibəsi qazisi imiş

Sumqayıt şəhərinin Corat qəsəbəsində həyat yoldaşını qətlə yetirən şəxslə bağlı dəhşətli faktlar ortaya çıxıb.

hadiseler.info “Musavat.com”a istinadən xəbər verir ki, həyat yoldaşı Şəhanə İmanovanı amansızlıqla öldürməkdə şübhəli bilinən 1993-cü il təvəllüdlü Əsgər Ağarəhim oğlu Hüseynov 44 günlük Vətən müharibəsi iştirakçısı olub.

Lerik rayonunda anadan olan Ə.Hüseynov müddətdən artıq həqiqi hərbi xidmət edən hərbi qulluqçu (MAXE) kimi Xüsusi Təyinatlı Həmlə Taborunun tərkibində Füzuli, Hadrut və Şuşa uğrunda gedən ağır döyüşlərdə vuruşub. Döyüşlər zamanı düşmən pusqusuna düşən hərbçi üç yerindən ağır yaralanıb, snayper gülləsi ilə qolu parçalanıb və döyüş yoldaşları gözünün önündə şəhid olub. Ermənilər tərəfindən ölmüş zənn edilərək soyulan qazi möcüzə nəticəsində sağ qala bilib. O, müsahibələrinin birində ağır qanitirmə zamanı susuzluqdan öz qanını içməyə məcbur olduğunu bildirmişdi.

Qeyd edək ki, faktla bağlı Sumqayıt Şəhər Prokurorluğunda cinayət işi başlanıb, istintaq-araşdırma tedbirləri sürətlə davam etdirilir.