Səudiyyə Ərəbistanı XİN: Neft kəmərinə hücum edən dronlar İraqdan buraxılıb

Səudiyyə Ərəbistanının Xarici İşlər Nazirliyi “Şərq-Qərb” magistral neft kəmərinə edilən dron hücumunu kəskin şəkildə qınayıb.

hadiseler.info xəbər verir ki, Ər-Riyad və Mədinə bölgələrində yerləşən neft kəməri İraq ərazisindən buraxılan bir neçə pilotsuz uçuş aparatının (PUA) zərbəsinə məruz qalıb. Hücum nəticəsində xəsarət alanların olduğu və infrastruktura ziyan dəydiyi bildirilir.

Buna baxmayaraq, Səudiyyə Ərəbistanı İraqın Baş naziri Əli əl-Zaidinin xahişini nəzərə alaraq cavab addımlarından müvəqqəti çəkinmək qərarına gəlib. Bu addım Bağdada İraq ərazisindən gələcək hücumların qarşısını almaq üçün müstəqil tədbirlər görmək imkanı yaratmaq məqsədilə atılıb. Rəsmi Ər-Riyad öz suverenliyini, təhlükəsizliyini və infrastrukturunu qorumaq üçün bütün adekvat tədbirləri görmək hüququnu saxladığını vurğulayıb.