Təyyarədə 40 santimetrlik ilan tapıldı – Uçuş ləğv edildi

Yaponiyada sərnişin təyyarəsinin pilot kabinəsində ilanın görünməsi reysin təxirə salınmasına səbəb olub.

hadiseler.info xəbər verir ki, hadisə Fukuoka hava limanından Kaqoşimaya uçmağa hazırlaşan “Japan Air Commuter” aviaşirkətinə məxsus təyyarədə baş verib.

Uçuşdan əvvəl pilotlar kabinədə kiçik sürünən gördüklərini bildiriblər. İlk axtarışlarda ilanı tapmaq mümkün olmadığı üçün 43 sərnişinin olduğu reys təhlükəsizlik mülahizələrinə görə ləğv edilib.

Təxminən 24 saat davam edən axtarışlardan sonra texniki heyət 40 santimetrlik ilanı salonun arxa hissəsində, dəhliz xalçasının altında taparaq zərərsizləşdirib. Mütəxəssislər onun Yaponiyada geniş yayılmış zəhərsiz zolaqlı ilan növünə aid olduğunu müəyyən ediblər.

Təyyarənin elektrik naqilləri və texniki avadanlıqları tam yoxlanıldıqdan sonra hava gəmisi yenidən istismara qaytarılıb. İlanın təyyarəyə necə daxil olduğu araşdırılır.