Tarixi qələbənin altıncı ili – Azərbaycanda Zəfər Günü qeyd olunur

Bu gün Azərbaycanda 8 Noyabr – Zəfər Gününün altıncı ildönümü təntənəli şəkildə qeyd olunur.

hadiseler.info xəbər verir ki, Prezident İlham Əliyevin 2020-ci il dekabrın 2-də imzaladığı Sərəncama əsasən, 44 gün davam edən Vətən müharibəsindəki misilsiz qələbənin əbədiləşdirilməsi məqsədilə hər il noyabrın 10-nun Zəfər Günü kimi qeyd edilməsi nəzərdə tutulmuşdu. Lakin dövlət başçısının növbəti günü imzaladığı dəyişikliklə, noyabrın 10-nun Türkiyədə Mustafa Kamal Atatürkün anım günü olması nəzərə alınaraq, Zəfər Gününün tarixi noyabrın 8-nə keçirilib.

Xatırladaq ki, Azərbaycan Silahlı Qüvvələrinin 44 gün davam edən “Dəmir yumruq” əməliyyatı nəticəsində beş şəhər, dörd qəsəbə və 286 kənd işğaldan azad edilib. Vətən müharibəsi nəticəsində Cəbrayıl, Füzuli, Zəngilan, Qubadlı və mədəniyyət paytaxtımız Şuşa şəhəri, eləcə də Hadrut, Suqovuşan və digər strateji yaşayış məntəqələrimiz azad olunub.

2020-ci il noyabrın 10-da Azərbaycan Prezidenti, Ermənistanın baş naziri və Rusiya Prezidenti tərəfindən hərbi əməliyyatların dayandırılması barədə bəyanat imzalanıb. Ermənistanın kapitulyasiya aktı kimi yadda qalan bu razılaşmaya əsasən, Kəlbəcər, Ağdam və Laçın rayonları heç bir itki vermədən Azərbaycana qaytarılıb. Bundan başqa, 2025-ci il avqustun 8-də Azərbaycan və Ermənistanın xarici işlər nazirləri ölkə liderlərinin iştirakı ilə sülh sazişinin mətnini paraflayıblar.

Şanlı Vətən müharibəsində qəhrəmanlıq göstərən Azərbaycan Ordusu döyüş meydanında düşməni darmadağın edib, xeyli hərbi qənimət ələ keçirib. Həmin qənimətlər bu gün Hərbi Qənimətlər Parkında nümayiş etdirilir.

Qeyd edək ki, Azərbaycan bu haqlı mübarizədə 2908 şəhid verib, 6 hərbçimiz isə itkin düşüb. Bütün şəhidlərimizin əziz xatirəsini dərin ehtiramla yad edirik!