Yevlaxda 56 yaşlı kişi balıq tutarkən kanalda boğularaq həlak oldu

Yevlax rayonunda balıq tutmaq istəyən orta yaşlı kişi su kanalında faciəvi şəkildə dünyasını dəyişib.

hadiseler.info xəbər verir ki, bədbəxt hadisə avqustun 17-si gecə saat 01:00 radələrində Yuxarı Şirvan kanalının Yevlax rayonunun Xanabad kəndi ərazisindən keçən hissəsində qeydə alınıb.

Qaramanlı kənd sakini, 1970-ci il təvəllüdlü Tofiq Qaçay oğlu Süleymanov balıq ovlamaq məqsədilə qayıqla kanala daxil olub. Güclü su axını qayığı bənd istiqamətinə sürətlə aparmağa başlayıb. T.Süleymanov təhlükədən yayınmaq üçün özünü suya atsa da, axına müqavimət göstərə bilməyərək boğulub.

Axtarışlar nəticəsində T.Süleymanovun meyiti kanalın Ağdaş rayonunun Şəkili kəndi ərazisindən keçən hissəsində tapılaraq sudan çıxarılıb.

Faktla bağlı rayon prokurorluğunda araşdırma aparılır.