Tramp: “İrana dərhal hücum etmək planımız yoxdur”

ABŞ Prezidenti Donald Tramp Tehranla münasibətlərin müsbət məcrada olduğunu bildirərək, hazırda İrana hərbi hücum etmək üçün təcili planlarının olmadığını açıqlayıb.

hadiseler.info xəbər verir ki, bu barədə ABŞ lideri “Financial Times” qəzetinə müsahibəsində danışıb.

Zərurət yarandığı təqdirdə hərbi əməliyyatlara tam hazır olduqlarını vurğulayan Tramp İranla mövcud gərginliklə bağlı vəziyyətdən narahat olmadığını qeyd edib. O, İsrailin Baş naziri Benyamin Netanyahunun mümkün hücumla bağlı mesajlarına toxunaraq bildirib: “Biz hazırıq. Lazım gələrsə hərəkətə keçməyə hazırıq, lakin buna ehtiyac olmaya da bilər”.

Müsahibəsində iqtisadi məsələlərə də toxunan Ağ Ev rəhbəri aralıq seçkilərdən sonra enerji qiymətlərinin sürətlə enəcəyini proqnozlaşdırıb. O, hazırda Hörmüz boğazından daşınan neftin həcminin əvvəlki dövrlərlə müqayisədə artdığını, ABŞ-nin İran limanlarına tətbiq etdiyi dəniz blokadasının isə Tehranı iqtisadi cəhətdən ciddi şəkildə məhdudlaşdırdığını diqqətə çatdırıb.