Türkiyədə sosial şəbəkələrə girişə yaş məhdudiyyəti qoyuldu

Türkiyədə noyabrın 1-dən etibarən 15 yaşına çatmamış uşaqların sosial şəbəkələrdə hesab yaratmasına və platformalardan istifadəsinə qadağa qüvvəyə minib.

hadiseler.info xəbər verir ki, bu barədə “İctimai Xəbərlər Xidməti” məlumat yayıb. Yeni qaydalar istifadəçilərin yaşının yoxlanılmasını, 15-18 yaş arası yeniyetmələr üçün isə əlavə məhdudiyyətlərin tətbiq olunmasını nəzərdə tutur.

Türkiyənin Ailə və Sosial Xidmətlər naziri Mahinur Özdemir Göktaşın verdiyi məlumata görə, mövcud hesabların sahiblərinin yaşının yoxlanılması prosesi 2027-ci il martın 31-dək davam edəcək və keçid dövründə platformalar yaş həddinə çatmayanların hesablarını mərhələli şəkildə bağlamalıdır. Qaydalara əsasən, istifadəçilər e-Devlet elektron xidmət sistemi vasitəsilə şəxsiyyətlərini təsdiqləməli və rəqəmsal identifikasiya tokeni almalıdırlar.

Tətbiq edilən əsas məhdudiyyətlər bunlardır:

 15 yaşdan kiçiklər: Platformalara giriş əldə edə bilməyəcəklər.

 15-18 yaş arası yeniyetmələr: Yalnız dostları ilə yazışa biləcək, lakin canlı yayımlar aça və böyüklər üçün nəzərdə tutulan reklamları görə bilməyəcəklər.

Yeni tələblərin pozulmasına görə həm sosial şəbəkə platformalarına, həm də yaş məhdudiyyətlərini aşmaq məqsədilə saxta hesab yaradan şəxslərə qarşı sərt sanksiyalar nəzərdə tutulub.