Ukraynada sülh üçün 7 ölkə İstanbulda toplaşır

Ukraynada müharibənin başa çatdırılması yollarını və regional təhlükəsizlik məsələlərini müzakirə etmək üçün yeddi ölkənin xarici işlər nazirləri oktyabrın 23-də İstanbulda bir araya gəlirlər.

hadiseler.info xəbər verir ki, bu barədə AFP agentliyi Türkiyənin diplomatik mənbələrinə istinadən məlumat yayıb.

Türkiyənin xarici işlər naziri Hakan Fidanın ev sahibliyi edəcəyi diplomatik sammitdə Türkiyə, Böyük Britaniya, Almaniya, Fransa, Səudiyyə Ərəbistanı, Pakistan və Misirin xarici işlər nazirləri iştirak edəcəklər.

Məlumata görə, bu yeddi ölkə Türkiyənin təşəbbüsü ilə ilk dəfə “R4+E3” formatında bir araya gələcək. Görüşdə Rusiya-Ukrayna müharibəsinin diplomatik yolla dayandırılması imkanları ilə yanaşı, Avropa və regional ölkələr arasında əməkdaşlığın genişləndirilməsi nəzərdən keçiriləcək.

Görüşün gündəliyinə həmçinin Yaxın Şərqdəki gərgin vəziyyət, Fələstin məsələsi, Yəməndəki son hadisələr və Hörmüz boğazında gəmiçilik təhlükəsizliyi daxil edilib.

Xatırladaq ki, həm Rusiya, həm də Ukrayna ilə sıx diplomatik əlaqələrini qoruyub saxlayan Türkiyə müharibənin sülh yolu ilə həlli üçün vasitəçilik səylərini ardıcıl olaraq davam etdirir.